Ang mga dulang ito ay bahagi lamang ng ilang mga sinulat ko nang mahigit tatlumpung taong pakikipagsapalaran at pagsusulat para sa entablado.  Isinulat ko ang mga ito sa Pilipino at Ingles at binubuo ng mga monologo, maiikling dula, isang-yugtong dula, at mga dulang ganap ang haba.  Ang mga dula ay orihinal o hango sa mga maiikling kuwento, mga episodyo ng ating kasaysayan, at mga bahagi ng buhay ng mga ordinaryong tao.  Ang ilan ay naitanghal na sa mga propesyunal, komunidad, at mga unibersidad na dulaan.  Ang mga iba ay naisama na sa mga antolohiya at mga dyornal na pampanitikan.  At ang mga ilan pa ay ngayon lamang nailathala.

May nagtanong sa akin dati kung paano ako nagsimula sa pagsusulat ng mga dula.  Ang sagot ko ay nagsimula akong maging mandudula dahil sa hindi ako marunong umarte sa entablado.  Dahil dito ay sinubukan ko pumasok bilang tauhan sa aspeto ng produksyon para sa entablado.  Dito ko naman nadiskubre na may mga mas magaling pa sa akin sa larangan ng pag-ilaw, pagbibigay-tunog, at disenyo.  Kaya sinubukan ko magsulat ng mga dula.  At, awa ng Diyos, dito ako nagtagumpay.

-Mula sa Panimula